Vincent聽講，由於單位只係得一半業權拎出來拍賣，新買家就算買返來都未必可以住，故相信單位會由揸住另一半業權嘅業主買入機會較大。環亞物業拍賣董事曾俊傑話，單位實用面積510方呎，現時一半業權開價40萬元，而文蔚樓對上一宗同類型單位成交係中低層22室，相同實用面積，不過成交價就要195萬元，即係今次拍賣開價比市價低咗近六成。

穗禾苑6萬蚊上車

近排樓市係咁升，Vincent唔少朋友大嘆入市做業主十分困難，不過原來手揸幾萬蚊現時都可以買到東鐵沿線區域單位。聽世紀21陽光物業陳朝霞講，新近就有個火炭穗禾苑嘅租客入市，以128萬元買入屋苑A座低層面積538方呎單位，呎價2,379元，佢只係畀咗6萬餘元（即樓價5%）作為首期就升級成為業主，其餘就向銀行承做九成半按揭，月供約5,600元，比之前每月租金開支6,300元，足足慳咗11%，相當划算。至於個單位原業主在○七年五月買入，亦只係揸住兩年，帳面就賺咗42萬元，期內嘅樓價升幅接近五成，賺幅亦係相當可觀。

（Vincent Lau）