本文重點
中移（00941）董事長王建宙早前訪台，大讚靠山寨手機而成為內地手機芯片一哥嘅聯發科技，準確把握市場機遇。說時遲那時快，近日傳出中移將與聯發成立合營公司，共拓TD手機芯片業務，雖然聯發即時澄清「近期並無這項投資案」，但此舉仍引來兩岸手機業者極多猜測。
傳夥聯發成立合營
聯發嘅「山寨王」封號，係源於佢哋嘅低價2G手機芯片廣為內地山寨手機所採用。台灣傳媒話，中移將出資七成與聯發喺內地成立合營共拓TD芯片業務，藉此加快TD手機嘅普及，又可降低個價，並認為聯發透過有關合作極可能成為全球手機芯片一哥，不過呢單料好快就畀當事人否定。
但唔少人認為，中移為普及TD而與聯發進行深度合作並唔出奇。事實上，王建宙近日已表明，即使係被視為高端嘅OPhone手機，中移亦希望售價最終能降至1,000元人民幣水平，所以中移與聯發進行合作嘅消息，相信亦非空穴來風。
余絲韻