本文重點
為咗吸納投行大客，英國泰晤士河旁市中心大業主為野村提供免租期優惠，連同收購雷曼兄弟業務在內嘅超過4,000名野村員工，會由倫敦金絲雀碼頭遷往泰晤士河旁嘅市中心區域。免租期有幾長？原來有成6年，難怪野村願意勞師動眾大規模搬竇。
金絲雀碼頭向來係倫敦金融區，野村肯搬家，一來係業務擴充需要，又可與收購咗嘅雷曼員工有更佳整合，二來係樓高12層高嘅新地點Watermark Place又近市中心，經常OT嘅員工可慳番唔少交通時間，同客戶密斟都方便啲。
平租吸引簽約20年
雖然新地點業主「牛津物業」要野村簽20年租約，但每平方呎租只係40英鎊，較高峰期呎租70英鎊足足平咗四成幾，更筍嘅係野村要到二○一五年才需要交租！就連為野村做地產顧問嘅Drivers Jonas合夥人Lethbridge都話，呢單交易係倫敦新寫字樓物業有史以來最大宗嘅，亦相信租約條款喺佢未來職業生涯將唔會再見到。
余絲韻