本文重點
呢個世界其實好細，好多人好多事，兜兜轉轉可能都會重遇番。好似之前喺星展嘅張耀堂（Sunny），今趟就代表Visa與星展合作推出信用卡，見番以前嘅舊同事，仲一齊合作無間咁搞活動，Sunny話感覺認真特別。
之前係星展董事總經理兼大中華區個人銀行業務總監嘅Sunny，今年四月開始出任Visa香港及澳門地區總經理。
Visa夥星展推卡
星展、Visa與電訊商3最近合作推出信用卡，Sunny以前同開星展嘅同事合作，今次生意雖然係代表唔同公司，但佢話過程十分流暢。咁又係，Sunny之前喺星展廣受同事歡迎，大家都好鍾意同佢合作。
講開星展，集團行政總裁施瑞德病逝後，依家終於搵到人接替佢個位，無獨有偶，新任行政總裁Piyush Gupta同施瑞德一樣，都係來自花旗！
余絲韻