唔怪得合和上周三公布中期業績嗰日咁旺，既撞正金管局總裁任志剛離職前最後一次會見傳媒，又有30幾間公司同日公布業績，原來嗰日係「好日」。Thomas話好多上市公司都會揀「好日」公布業績，但依家要就埋收緊咗嘅董事禁售期加快「放榜」，搞到可選擇嘅日子唔多。

忙趕業績暑期冇假放

身為上市公司商會副主席嘅Thomas大嘆收緊董事禁售期後，搞到佢七、八月都無暑假放，要忙住趕起業績，否則被人「綁住手腳」，一旦有人玩嘢搞狙擊都無力還手。他仲話已計劃喺明年二月公布全年業績，但咁啱明年春節撞正「情人節」，喺兩大節日下，佢哋又要趕餐死。

百忙之中，Thomas都仍好熱心推廣佢嘅冰球活動，佢話佢哋個冰球會搞嘅國際業餘冰球賽會喺九月底舉行，今次仲請咗Hot Cha三個靚女做主禮嘉賓。現時佢創辦嗰個冰球訓練學校已經有過百名學生，佢哋仲喺小學做推廣，早前Thomas更親身帶了一班小朋友學員去北京觀摩國家隊嘅滑冰訓練。

余絲韻