當日「紐約」大戰「蘇黎世」，上半場只係開咗波一分鐘，紐約人壽已先拔頭籌；後來再憑一記罰球，射中對方人牆改變方向再下一城，以兩球領先半場；下半場紐約人壽改打穩守突擊策略，雖然蘇黎世嘅隊員起勢咁攻，但都無功而回，最後紐約人壽保持2比0嘅賽果捧盃，隊中一對雙箭頭布子健及黎嘉亮仲分別以8個入球獲封神射手。

賽後身為領隊嘅紐約人壽行政營業總監溫金安話，代表隊由一班壽險顧問組成，隊員間已合作咗5年，平均每月出戰兩至三場業餘比賽，不但建立出良好默契，更有助增加實戰經驗；為應付今次比賽，之前仲進行過一輪篩選，以選出精英中嘅精英。

絲絲雖然唔識踢波，但望住一班球員喺球場上你追我逐，又真係幾刺激緊張，唔知萬一有球員唔小心受傷，會唔會有保險賠呢？

余絲韻