本文重點
自從內地發生毒奶事件後，內地食品監管愈來愈嚴謹，生產雞肉食品嘅大成食品（03999）為咗令人食得安心，增加食品來源嘅透明度，主席韓家寰話公司嘅產品上加咗Bar code，可上網追查產品嘅來源地方同生產日期，甚至食品來自邊個農場。
利用條碼上網查產地
韓總同絲絲講，依家係高科技時代，可上網查到任何嘢，為咗增加消費者對產品嘅信心，公司就利用互聯網方便消費者利用Bar code追查產地，公司已儲存三千多個農場嘅資料，而呢個追溯系統算係內地開創先河，不過佢哋嘅產品主要喺內地銷售，絲絲無緣喺香港試吓。
韓總又鼓勵人食雞肉少食牛肉，佢話唔係「賣花讚花香」，因為牛隻會排出好多二氧化碳，令地球嘅溫室效應更嚴重，少食一隻牛，會減少兩成嘅二氧化碳，原來養雞環保過養牛，相信韓總非常支持環保。
余絲韻