不過絲絲覺得有趣嘅係，佢一落機第一個見嘅人唔係乜嘢政要，更加無三大電訊手機商嘅份，同救災亦扯唔上關係，而竟然係去見紅透兩岸三地嘅亞洲音樂天王周杰倫，唔通王董係周董嘅fans？

續簽3年代言人合約

原來王董咁急見周董係因為要同佢續簽3年代言人合約，事關周杰倫早喺6年前開始，已係中移加值服務「M-ZONE動感地帶」代言人，佢唔單只創咗每3秒增加一個客戶嘅成績，更加喺內地掀起咗電訊大戰添！對公司業績有保證，在商言商，你話王董點可以唔急急腳搵咗周董先呀？不過，絲絲都唔排除王董可能係周董嘅fans，等下次同佢傾偈時問吓佢先。

尋日王董都有同人講，話佢今次嚟台灣最想傾嘅「大好事」當然係中移以177億元入股遠傳單嘢啦，雖然家陣都未知台灣方面會唔會批，但王董話「路總係要行，咁先會有路喎」，絲絲都希望佢今次可如願以償，唔使白行一趟啦。

余絲韻