港交所喺業績度話：「香港交易所現正與指數公司合作研究制訂以恒指期權價格為基礎的波幅指數，為市場提供波幅基準。」「波幅指數」唔算新事物， Chicago Board Options Exchange（CBOE）喺九三年已推出，發展到依家「VIX波幅指數」係用標普五百指數期權嘅引伸波幅做基準計算，CBOE仲發展出相關期貨同期權。咦！港交所研究推出，睇嚟都係想開源。

引伸波幅愈升愈驚

「波幅指數」唔係話你知依家個市有幾大波幅，其實係代表市場預期個市將會有幾大波幅，因為計算基準係期權嘅引伸波幅。引伸波幅代表期權平或貴（炒開窩輪應該會明白），當市場估計波動性上升或者市場風險增加，都會推高引伸波幅。

所以有人覺得「波幅指數」愈升，代表市場愈恐慌，變成「恐慌指數」。

咁用喺香港又得唔得呢？香港未有「波幅指數」，我惟有搵代替品。睇番○七年至今恒指走勢同恒指30日歷史波幅比較圖，恒指30日歷史波幅好似見底上升，唔通恒指真係受制於早前21,196點高位？

（大健）