散戶望跌市又唔敢Put

○七年「大奇迹日」出現前，恒指大約喺21,000點水平，「大奇迹日」收報20,387點，當日埋單跌285點，之後一個交易日恒指收報21,595點，升1,208點；翌日傳出「港股直通車」，呢個新名詞推動港股其後升咗一萬點，上到32,000點。

「大奇迹日」會否重現？信誠證券中環分行散戶歐先生就話，金融市場裏唔能夠排除任何事情發生：「以前個市一年一上一落，依家就三上三落。」佢話呢排少咗Trade，等緊大市跌番落19,000點，但又唔敢Put（做淡）。

僑豐證券零售業務發展董事連敬涵認為，依家股市無大跌嘅理據，中國日日動態微調，但大方向無變，就係繼續貨幣寬鬆政策，美國經濟數據亦無畀機會環球股市跌5%至10%，若港股單日成交得七、八百億元嘅話，大戶散唔到貨，但佢話有得炒美國經濟復甦，大牛市先會返嚟！

波浪大師：牛二難短炒

Baby啱啱同「新波浪大師」林一鳴食飯，佢話「牛二」唔同「牛一」，「牛一」升得多，但好急，散戶追唔切貨；去到「牛二」，市場普遍相信「牛來了」，個市升得相對少，而且過程漫長，可能拖拉一年以上，佢估今個「牛二」嘅頂喺25,000點，但中間會調整至17,100點水平（二浪底）並唔出奇。

不過，佢話「牛二」難短炒，散戶好易輸錢，情況似○三、○四年咁。○三至○八年港股牛市中，「牛二」長達3年，由○三年嘅10,917點（二浪底）升至○七年嘅23,558點（三浪頂），期間起起跌跌。

Twilight（暮光）係指黑夜來臨時，天空最後一線光（亦有指係早上第一線曙光）。依家講Twilight，少女會諗起Robert Pattinson（吸血殭屍片《吸血新世紀》男主角），Baby就諗起五、六十年代美國經典電視劇《Twilight Zone》（迷離境界），後來仲拍埋電影，都係圍繞奇幻恐怖故事。

牛市進入「迷離境界」？

花旗今年四月寫咗個叫《Twilight Zone》嘅報告，該行指喺經濟衰退時，企業盈利放緩，但股市可照樣升得爸爸聲，升幅可達30%至50%不等（港股已超額完成）。

財金世界嘅Twilight Zone其實都係指「迷離境界」，日本瑞穗證券首席投資策略師Carmine Grigoli咁樣講：「喺政策和盈利推動之間，夢幻和真實之間，有一個地方，其邊界取決於人類嘅希望和恐懼多於佢哋嘅知識，呢個就係迷離境界。」Grigoli話除非企業盈利持續改善，否則難有基本因素進一步推高股價，牛市進入咗「迷離境界」。

恒指上周無突破，但全周升2.5%，滬綜指就跌6.6%，今個禮拜開始內銀股公布業績，睇吓能否引領兩地股市走出「迷離境界」。

繼國開行後，滙豐中國本周發行人債，《東方產經》網上民意調查結果顯示，13%網友話喺本月有買人債，56.5%人話無，30.5%就話考慮中。

（Baby）

若然有料想報畀Baby或有嘢問，可電郵money.biz@opg.com.hk