上個禮拜大市又玩上又玩落，真係玩死我哋班鑊鏟友。北水可能斷供應，真係震散唔少信心，內地A股就率先反映晒，雖然港股好似唔係好跌咁，不過睇番上個禮拜啲股仔表現，就知其實炒得好個別，故現水平搵食要眼明手快，繼續炒股唔炒市。
上周五個市氣氛麻麻，不過隻中國食品（00506）突然彈升，想破頂咁嘅樣，計落佢真係大落後，又有內需概念，中國食品主要係經營民生飲食用品，當中以飲料業務有可能增長五成最有睇頭，的確係有得諗。上周大摩出報告唱好，睇5.9元，點知收多兩日貨，班基金佬就掃上，睇來都未炒完，咁不妨搭轉順風車，向上睇5.9元，最多跌穿4.75元即止蝕囉。
古晨