本文重點
自三月中各國官府大開水喉救經濟後，各地主要魚缸已連續多月上升，古勝一直擔心魚缸升幅過快，會否嚴重脫離經濟基本面，各地魚缸未露疲態，繼續向上。直至踏入八月份，各地魚缸走勢漸趨反覆，花旗魚缸在道指高見9,400點後，上升動力大減；本地魚缸衝上21,000關後行人止步，祖國魚缸上周更創下6個月以來，最大單周跌幅。今個禮拜各地魚缸何去何從，古勝烏卜卜。四叔開始沽貨，大家要留意事態發展。依家要加緊留意資金流向，只要未見有資金大舉撤走，在下相信在炒股唔炒市的大前提下，缸邊友仍會入場搵食。
上周五花旗公布八月份消費者信心指數，竟在魚缸大豐收之際連續第二個月回落，華爾街憂慮經濟復甦係假象，花旗魚缸上周五全線仆直，三大指數更由強轉弱，終止之前連升四周的強勢。總結過去一星期，當中道指跌0.5%，標普500指數與納指亦分別跌0.6%及0.7%，係自七月十日近一個月以來，第一周錄得跌幅。
其實計一計條數，道指自三月中反彈以來，反彈幅度已近五成，話唔定花旗魚缸已用盡全力，唔排除在後勁不繼下，增添沽壓。至於上周表現疲弱的祖國魚缸，若未能扭轉弱勢，滬綜指數或失守三千關，本地魚缸被前後夾擊，恒指極有可能下試二萬關，甚至19,500點水平。幸而暫未見資金大量流走，不過魚缸現貨場成交額縮水，反映缸邊友心口唔再見個勇字，在二萬關高位未再積極追貨，令本地魚缸下調壓力大增。
盈利維持穩定增長
古勝一向都話炒股唔炒市，今日推介山東墨龍（00568），此股相對大市表現仍落後，現價上車風險較低。山東墨龍早已表示，計劃回歸祖國魚缸，並在H股完成10合1程序後，發行7,000萬股A股上市，咁啱呢期H股掀起回歸A股炒風，山東墨龍自有其吸引之處。
雖然近日油價有回吐壓力，但山東墨龍主要從事石油機械設計研究、加工製造、銷售服務等業務，油價上落對其股價波動影響較少。集團近幾年盈利增長理想，去年純利升53%至3.06億元人仔，毛利率達19.4%。祖國已開始積極建立戰略石油儲備，山東墨龍料可受惠，加上原材料成本下降亦有助毛利繼續提升，後市值得睇高一線。
古勝