尋日內地公布的數據表現總算符合市場預期，因此尋日中港兩地股市，齊齊穩步向上，恒指收報21,074點，收市價再創過去十一個月以來的新高；之不過，成交金額亦都創下過去三個多星期的低位，繼續同恒指走勢背着走。點都好啦，記住現階段入市，仍要小心為上！
有消息指，網龍（00777）將經營iPhone內地網上商店，令其股價大幅炒上，同時亦帶動一眾科網股齊齊做好。不過，在現今這個資金市中，料炒作對象日日都有不同，因此現階段再追入跟炒，值博率不高。不過，講開呢類型股份，真係不得不提隻騰訊控股（00700），皆因佢不但在今次呢個金融海嘯中復原得較快，股價更屢創新高，尋日就收報117.5元，認真犀利。
（小尾）