外圍股市持續做好，恒指再升144點或0.6%，報收21,074點。即使恒指企穩21,000點收市，但詩詩仍有戒心，因為成交縮水至656億元，係近兩個星期成交最少一日。詩詩見西王糖業（02088）連續第三日上升，恐怕會有回吐壓力，先以每股2.15元沽出套利。
二三線股仔上升動力大減，唔再好似早前乜都炒，詩詩都係要睇番基本因素，因為股仔無乜勢可跟。濱海投資（08035）日前公布截至○九年六月底止三個月業績，股東應佔溢利1.98億元，每股盈利3.14仙，不派息，○八年同期錄得虧損2,143萬元。
濱海的新大股東天津泰達為天津經濟技術開發區管委會成立的國企，獲授權管理同經營國有資產，業務範圍廣泛，包括水務、能源、燃氣供氣等公用事業，另外亦從事財務、基建、保險、工業同房地產發展等業務，資產總值高達1,300億元人民幣。濱海的本業成功扭虧，不過早前已將旗下30家燃氣接駁及銷售附屬公司一併售予母公司，相信係為日後注入其他非燃氣資產鋪路，未來發展值得憧憬。
詩詩