本文重點
保利協鑫（03800）近排動作頻頻，做完一單263億元嘅大型收購後又配股集資，公司首席財務官湯以銘（Samuel）就話今次單「刁」好有成功感，不過辛苦完一大輪，自然要放假「叉電」，佢就決定帶埋屋企人去溫哥華旅行，實行搭吓當地著名嘅威士拿（Whistler）號火車歎世界！
搞掂大「刁」不枉此生
保利協鑫近期非常威水，收購多晶硅業務後市值十級跳，當中出力不少嘅Samuel自然高興，佢同絲絲講，全公司因為呢單「刁」辛苦咗兩個幾月，佢本人仲捱咗幾晚通宵，不過話分兩頭，佢話今次單收購交易按金額計，係近10年嚟僅次於李澤楷當年收購香港電訊交易嘅第二大「刁」，可以參與咁大單交易，都算不枉此生喎！
千辛萬苦終於搞掂成單交易，Samuel就決定攞大假去「叉電」，佢今日就會出發去溫哥華同家人會合，試搭今年先開始通車嘅威士拿號火車，去北美度假勝地威士拿滑雪。絲絲聽Samuel講，威士拿號火車最特別嘅就係車廂採用玻璃窗設計，欣賞沿途風景就最一流，無他嘅，辛苦咗咁耐，梗要玩番夠本啦！
余絲韻