大市愈炒愈高，上周五突然急挫震走唔少鑊鏟友。經過兩日來測試餘震後，昨日又見炒友埋位，雖說現時係位高勢危，不過今次資金市實屬十年難得一見，大市死唔去，自然又要重新埋番位，否則將來只會愈追愈高。
其實經上周五震一震後，唔少股價都回落番唔少，調整過後走勢都健康啲，好似隻中國電力新能源（00735）咁，內地新能源炒到咁熱，如果唔係出現震倉，邊有機會喺低位買到，現時10日、20日及50日線集中晒喺0.62元，上周五一震穿晒位，唔少炒友被震落車，昨日一口氣升番上來，如果守穩0.62元呢個位，代表另一次升浪好大機會重臨。
如果見番上次高位0.8元，現價計落都有三成幾空間，近期0.54元幾硬淨，可作為止蝕位。
古晨