26年前遇海盜險死

早排成日聽到有中國嘅船喺索馬里海域畀海盜搶劫，估唔到魏總亦曾親歷險境，老友話魏總喺八二年仲做緊船長，駕駛「協友號」貨輪喺新加坡海峽航行時，有日凌晨4點揸揸吓船，突然有幾個黑麻麻嘅人企喺佢面前，佢當時仲以為自己發緊夢，當佢意識到係海盜，要拎起電話求救時，條電話線已經畀對方切斷咗。

啲海盜係咁大聲同佢講「Money！Money！」又用刀面大力拍佢塊面，仲將佢五花大綁，後尾啲海盜搵到保險箱鑰匙，拎走咗一啲港幣同美金嘅零錢，加一隻價值38元人仔嘅手錶。八二年嗰時中國船員仲係好窮，以上已經係魏總全副身家，就喺呢個時候辦公室電話突然間響起，救咗魏總一命，啲海盜以為係警報響拿拿聲閃晒，如果唔係，魏總條命仔就真係凍過水。之後嗰一個月，魏總晚晚瞓到凌晨4點都會「扎」醒，皆因當時情景真係好驚險呀。

金占士