本文重點
曾經係內地女首富嘅玖龍紙業（02689）董事長張茵，喺玖紙上市時，已經安排佢個大仔劉晉嵩做非執行董事，玖紙尋日終於宣布，劉晉嵩會轉做執行董事，訂明三年服務合約，每年董事袍金九十八萬元，花紅則另計。
絲絲記得張茵有兩個仔，三年前大仔劉晉嵩喺美國哥倫比亞大學修讀碩士，當年玖紙上市時，張茵安排當時只有二十四歲嘅劉晉嵩做公司非執董。曾經有人質疑劉晉嵩是否適合做非執董，張茵力挺個仔，話相信佢有能力勝任，但以後嘅路要靠佢自己。依家個仔轉咗做執董，證明佢有能力為公司做事。
黃偉常酬金冠六福
另一間上市公司六福（00590）尋日出咗年報，執董兼行政總裁黃偉常繼續蟬聯董事酬金榜首位，○九年度袋咗三千零八十八萬元酬金，較○八年度增加三成半。
黃偉常嘅一對寶貝仔女黃浩龍及黃蘭詩，薪酬首次出現喺董事酬金報表內，兒子黃浩龍酬金有五十二萬四千元，女兒黃蘭詩有五十七萬三千元。兩人喺去年九月一日分別獲委任為執董。
余絲韻