本文重點
金融世界雖然日日講錢，不過市民大眾以至金融專才嘅心目中始終有把尺，好似早排公布靚靚季度業績嘅高盛，喺近期一項訪問17,000名美國人嘅品牌調查中，名聲不升反跌，仲差過同行對手摩根士丹利，與兩年前結果剛好相反。
點解高盛季度業績超理想，但仍被國民及同行睇低一線？事出當然有因，近期包括企業管治人士、傳媒及立法機關都指摘高盛，話佢哋有份引致去年金融海嘯，仲指控高盛計劃派發如○六、○七年美好日子般嘅巨額花紅予高層員工。
被指倚助政治聯繫
而令美國人更不滿嘅係，高盛之所以未如去年九月雷曼兄弟般倒閉，主要係佢倚助其於華盛頓嘅政治聯繫，當時嘅美國財長保爾森正好係高盛前大班。近期美國傳媒更披露，華府去年之所以挽救AIG，部分原因係高盛於AIG持有重大利益，一旦AIG倒閉，高盛肯定有事。
正如負責調查嘅Anne Rivers坦言，直至今時今日，高盛喺公眾嘅印象，一如由米高德格拉斯（Michael Douglas）喺八七年電影《華爾街》飾演Gordon Gekko般，他講出名句「貪心係好嘅」！
余絲韻