本文重點
證券經紀業協會呢個月下旬就會換莊，現任主席李耀新功成身退，新主席估計係現時兩名副主席之爭，即係大福證券集團（00665）執行董事李耀榮以及嘉信控股董事及總經理馮煒能。
遠征推介自掏腰包
雖然做證券經紀業協會主席有名譽又有地位，但絲絲聽聞呢個主席位原來唔易做，因為好多時主席都要自掏腰包，出錢又出力。好似應政府及港交所（00388）邀請到海外推介本港證券市場，都係由主席自費，所以話主席呢個位，少啲「經濟」實力都幾難做。
早幾年油價狂升，政府猛話要吸中東錢，近年又話單靠內地企業來港上市唔足夠，要開拓上市地來源，吸引海外企業嚟香港上市。過去政府同港交所幾次長征，好似去俄羅斯、中東、越南等，證券經紀業協會多數都會參與，仲係唔遠唔去，所以有中環友話，證券經紀業協會最近呢兩屆主席即係李耀新同艾秉禮，做主席都應該使咗唔少錢。
證券經紀業協會約有1,300幾位會員，每年會費唔多，會費收入主要用嚟支付協會職員嘅人工等雜費，好彩佢哋有自己會址，唔使交租。
余絲韻