雖然港股連升四個多月，不過升勢停不了，昨日更是齊齊大放煙花，各個板塊都大炒特炒，百股爭鳴。滙控（00005）業績好過預期，相信港股再創今年新高機會甚大，難怪昨日全線資金偷步入市，鑊鏟友炒股唔炒市，趁現在氣氛仍在，就算唔執多都要執番少少。
大市愈炒愈高，要高追的確會心驚驚，反而古晨就幾鍾意隻中國農產品（00149），話說六月中完成配售20億新股，佔新發行量的68%，早兩個禮拜前開埋特別股東大會，轉手一事完全搞掂，只等東風。該股靜焗咗咁耐，昨日成交突然增加，似準備開車，其股價過去兩三個月幕後人士力壓，無點炒過，現時啲股仔炒得幾癲有目共睹，趁價低小注跟進，博炒上0.4元，跌穿0.22元止蝕。
古晨