港股連升多日後，尋日終於出現較為似樣的調整。受內地有消息指，下半年新增貸款總額只會縮減至約千多億元人民幣，在憂慮中央「急煞車」下，恒指一度跌至19,797點，但低位有買盤支持，最終返回20,000點樓上。
受內地調低汽油及柴油價格影響，石油石化股尋日亦都相繼錄得跌幅，當中就以上石（00338）跌幅較大，全日跌5.29%，收報3.22元。
至於尋日上市的金隅（02009）及中國建築A股，就齊齊成為跌市奇葩，兩者全日升幅都達56%。升得咁勁，持貨者點睇？有人話，眼見大市調整，所以索性沽貨離場，實行袋袋平安，但亦有老友話要揸到13元先會放喎！點都好啦，今日就係期指結算，相信又會有一番波動，現階段持貨，都係小心啲好。
（小尾）