本文重點
香港有唔少人愛打高爾夫球，好似工銀亞洲（00349）董事兼副總經理黃遠輝咁，雖然工作好忙，但每周都會抽時間打吓波，遲啲佢仲會返老家海南行吓順便打吓波。尋日工銀亞洲與內地嘅鷹皇商務科技合作推出咗張1872高球雙幣信用卡，黃遠輝仲落場打咗幾桿露身手。
內地打高球fit晒
依家香港成日都講珠三角融合，今次呢張卡正好夾到呢樣嘢，根據佢哋估計，本港約有10萬至15萬名高球愛好者，不過香港地寸金尺土，好難可以打到大場，返內地打就最好，但好多時都要做咗會員至可玩，但如果申請咗呢張卡，唔使做會員也可以打波。
黃遠輝話，好多時去內地旅行或公幹，如果有呢張卡就可去到邊打到邊。鷹皇商務科技董事總裁謝磊都話打高爾夫球唔係貴族玩意，希望一般普羅大眾都可做到「想打就打」，期望三年內可發5萬至8萬張卡，其實佢哋都好希望三年內可以喺內地上市，不過就要等業務再成熟啲、發展再穩定啲先。
余絲韻