本文重點
絲絲同粵海集團嘅朋友食飯，席上提到佢老細李文岳，老友即時反應係：「哇！佢好嚴㗎！」原來李總份人好講原則，佢曾經話社會咁大唔輪到佢話事，但作為公司董事長，佢就要喺公司內推行誠信、廉潔嘅文化。老友話試過好多次有同事因誠信有啲問題，唔係被炒就係降職，有一年粵海上上下下走咗成90人咁滯，唔多唔少與此有關。李總揸正嚟做，賞罰分明，令公司同事對佢既敬且畏。
絲絲諗起有次同李總傾偈時，佢都話自己喺金融危機時加入粵海，同前董事長武捷思一齊搞呢次全亞洲最大宗嘅債務重組，之所以發生債務重組呢件事，其中除咗管理不善外，與部分職員誠信有問題有不可抹殺嘅關係，前車可鑑，所以佢依家揸到咁正嚟做。
寧聘愚人唔揀小人
李總話，司馬光嘅《資治通鑑》內有句說話：「有德有才為之聖人，有德無才為之君子，有才無德為之小人，無才無德為之愚人」，當然佢用人最希望請到聖人同君子，如果得小人同愚人佢揀，佢寧願揀愚人都唔揀小人，事關前者唔會諗計做壞事，但小人可以做出天大嘅壞事。
余絲韻