本文重點
新地（00016）業績公布前夕，難得見到副主席郭炳江百忙中抽閒，喺馬灣挪亞方舟嘅「愛與生命之旅」活動上跟成班年輕人分享人生經驗，郭生知道在座好多位年輕人都可能曾經行差踏錯，喺人生路上已遇到好多挫折，所以一開始就勉勵佢哋，話最緊要係唔好放棄自己，當情緒好差或者喺逆境下，可試吓出吓街、跑吓步兼搵朋友傾偈。
送波鞋券勉勵年輕人
為咗令班後生仔可以付諸實行，郭生好闊綽咁送咗65張500蚊波鞋現金券畀每位年輕人，寓意係希望佢哋揀好自己條人生路，由聽日開始跑出第一步。郭生仲語重心長話唔好以為吸食K仔，或者用其他負面兼無用嘅方法可以逃避現實。
郭生絕唔係「大隻講」㗎，仲話若果發現自己個女吸毒，都唔會鬧佢。好似佢個女咁，細細個就唔多鍾意讀書，郭生竟然諗到用講古仔呢招引導個女，最貼心係佢仲自創同個女性格好似嘅角色，等個女可自我反省；當個女歷史科考試前一晚，郭生仲會刨定歷史書充當故事內容添。
既然喺挪亞方舟上分享，郭生好有心思咁話，希望年輕人可以好似獅子咁勇往直前，仲要好似鷹咁有遠大嘅目光，亦最好似駱駝咁捱得；至於兔仔都好重要，皆因呢個係佢嘅生肖喎。
余絲韻