上證升咗咁耐，昨日終於出現震盪，不過跌成八個巴仙又幾嚇人，而且成交唔係細，深滬兩地夾埋成4,300億元人民幣成交。上證震一震，恒指一度急跌逾800點，不過市場秩序尚算良好，而且唔少股仔依然埋頭喪炒，大市仍保持炒股唔炒市。
近期內地概念抬頭，首長科技（00521）去年夥拍中國南方銀視，共同發展中國數碼電視地方項目，首長科技佔該項目49%股權，負責提供技術服務，包括技術解決方案和機頂盒等設備。由於內地數碼電視發展一日千里，令新業務發展相當理想，近期集團已積極出售非核心業務，一心一意搞好數碼電視業務。圖表上，首長科技出現小圓底回升格局，走勢相當靚仔，向上見0.85元無難度，止蝕位可以放喺0.55元。
古晨