美國幾間大企業好似微軟、亞馬遜以及美國運通，上個禮拜公布業績都差過預期，但消息並冇拖累整體美股氣氛，除了納指輕微下跌7點外，道指仍然上升23點，收報9,093點。由此可見，美股似乎跌唔落。
再睇港股，上周五恒指雖然喺20,000點樓上只係短短停留咗兩分鐘就跌番落嚟，但勢頭依然強勁，全日再有36隻熊證被收回，所以計我話，現階段真係不宜輕易做淡。
本港新股炒風仍然熾熱，內地股市亦都唔弱，繼中國建築呢隻「大龍躉」之後，光大證券亦都獲得中證監批准發行A股，成為六年以來，內地首間證券商獲批上市。難怪早前內地證券股紛紛偷步先行。其實內地股市近期勁升，券商股早已炒起，料及後仍會有炒作，值得留意。
（小尾）