Baby最近跟咗耀才證券市務總監郭思治北上，原來郭Sir逢周末都會去佢哋喺廣州嘅投資諮詢中心開壇，同內地股友講吓港股走勢。雖然港股直通車仲「裝嵌」緊，但唔少內地股友對港股感興趣，佢哋鍾情於相對A股有大折讓嘅H股，又提到中移（00941）、滙控（00005）及部分ETF（交易所買賣基金）等。
「港股較公平」
「中國沒有牛市，沒有熊市，只有政治市。」內地散戶林鵬程話A股只可以買單邊，唔能夠沽空，股市最終聽命於政府；港股則較公平，有機會一定投資港股，尤其係比內地便宜得多嘅H股，以及未於內地上市嘅股份，例如中移。
早喺○七年底，散戶李先生已透過香港朋友買港股，「我想買晒全世界嘅嘢！」佢話已買入喺香港上市嘅印度股票ETF，佢認為香港係個好好嘅平台，可投資全世界。
「A股較『獨立』」
邱小姐就話港股唔及A股好玩，佢估計滬綜指可上望3,600點，甚至係3,800點（上周五滬綜指升近3,400點水平），不過佢都有留意香港上市嘅內房及金屬股，由於期銅價格顯著反彈，以及黃金可以抗通脹，佢尤其鍾意嘅股份係江西銅業（00358）。
另一位股友黃先生就話，港股較易受美股影響，A股比較「獨立」，相信將來主戰場仍係A股，「始終買賣港股係隔山打牛，好難日日操作。」