波浪專家估即將大升

恒指上個禮拜接連「升呢」（升Level），上周一升穿19,000點，上周五再升穿20,000點，雖然企唔穩，但全城振奮。祖國同花旗國當然功不可沒，滬綜指上周連破3,200及3,300點，上周五差兩點就搞掂埋3,400點；道指更加過四關添，8,800點、8,900點、9,000點及9,100點升穿晒。

童話故事《狼來了》除咗教人一個大話唔好講多過兩次之外，仲話畀我哋知故事嘅主人翁牧童可以開口中，以及狼最終真係會出現。以上好似係一堆廢話，但套落今個港股升浪，被稱為新波浪理論大師嘅銀聯信託投資總監林一鳴就有啲似「牧童」，佢喺今年一月已經話港股熊轉牛，嗌咗半年「牛來了」，一直無人相信，到依家佢認為「牛一」轉為「牛二」，即將開展一個大升浪（三浪）。

信誠證券研究部高級經理劉兆祥同樣利用波浪理論嚟估市，但佢認為依家恒指喺五浪，泡沫經已形成，浪頂喺25,000點附近，今個禮拜恒指預料喺20,000至21,000點之間上落，只要成功突破20,500至20,700點阻力，便可以乘風破浪。

散戶「畏高」 短炒密食

姑勿論「牛一」、「牛二」定係「牛三」，愈嚟愈多人定調港股「牛出沒」。散戶林先生覺得現時屬於「小牛市」，股市整體勢頭向好，本周恒指大有機會升至21,000點，大市支持位約喺18,000點。不過股市變幻莫測，林先生坦言有少少驚：「上星期主要做短炒，一日走幾轉，差唔多日日都有胡食，執三千幾蚊就會出貨。」佢話最近滙控（00005）表現轉好，加上下周公布業績，所以上周玩咗一輪滙控，試過65元買入，70元附近沽出，一日內出入幾次，回報不俗。

主要以期權、股票作策略性投資組合嘅散戶吳先生就話，以技術分析而言，股市傾向升市，恒指若升穿20,041點，就好有機會再升。佢認為恒指跌至10,676點屬於熊市，升穿32,000點才屬於牛市，在兩者之間徘徊嘅屬於上落市。

今次《東方產經》網上民意調查問股友，本周恒指會見幾多點？28%人認為可見21,000點樓上，估見20,001至21,000點嘅就有46%，15%人認為大市回落至19,000至20,000點，只有11%人估會跌落19,000點以下。

熊證受捧即係未見頂？

唔少人認為恒指由11,000點升上20,000點係Sucker's Rally（騙人的升市），唔少散戶見個市愈升，就愈買Put或熊證，雖然近日唔少恒指熊證「猝死」，但資金繼續流入「熊仔」。如果你認同散戶好多時候都係錯嘅話，當資金持續轉入「牛仔」，到時看淡都未遲。

北京金隅（02009）凍資達4,650億元，資金明日解凍，雖然唔少係孖展飛，但港股上到呢個關鍵位，有5%資金出嚟撐場都好。下周一滙控掀起藍籌業績公布期序幕，去年上半年個市未係咁差，今次份中期業績預咗唔靚仔，但只要係好過市場預期，已經可以當好消息炒。

（Baby）

若然有料想報畀Baby或有嘢問，可電郵money.biz@opg.com.hk