上周五現貨場成交金額增至836億元，係六月初以來最多成交金額。雖然現貨場二萬關得而復失，但期貨場卻高水41點，報收20,024點。古勝上周已表示，在19,800點至20,200點水平有大量恒指熊仔街貨，既然大戶已狠心屠殺19,800點至20,000點逾百多二百隻熊仔，又點會放過在20,200點水平，街貨量高達8億份的恒指熊仔？古勝相信恒指下一較大阻力區在21,000點水平，喺到達此阻力位前，都係會反覆向上。

上周五本地魚缸再突破，多得火車頭大笨象（00005），再升1.6%至73.25元，又創供股後新高。紅色三保齊齊報捷，平保（02318）報68元，升超過3%，財險（02328）亦升1.85%至6.07 元，祖國野獸（02628）升幅相對落後，曾高見35.2元，再創一年高位，但收市僅微升0.14%至34.85元。

金管局上周五兩度向市場注資合共77.5億元，令錢莊體系結餘下周二預測會進一步增至2,095.17億元。水浸持續，料魚缸成交保持活躍，港交所（00388）突破140元關口，收市報141元。

自祖國落實推出3G服務後，三大網絡營運商為咗搶佔市場各出奇謀，但營運數據卻只有祖國電信（00728）表現較佳，祖國移動（00941）跟二奶電話（00762）則明顯被前者搶去部分客戶。而3G服務推出後，電訊設備商表現一直唔錯，事關佢哋係最大受惠者。

升幅遠較同業落後

睇番幾件電訊設備股，中通服（00552）可以話相當落後，中興（00763）現價跟高位只有一步之距，晒士較細的京信通信（02342），股價已較年初翻了兩番，中通服現價卻較年初價原地踏步，唔單只落後同業，亦跑輸魚缸幾條街。

以基本因素而論，中通服後台強勁，在業內算係龍頭級數，斷估唔會在現水平行人止步，加上有大行睇好，前景睇高一線，現價買入持中線，睇番52周高位6.45元，較現價有近三成上升空間。

古勝