之前成日聽人講，話經濟唔好、股市又唔好的時候，煙酒銷情會特別好，就連女仔啲裙亦都會特別短。睇番近日情況，就似乎真係中晒，以g模為例，啲衫件件都鬼咁短；啤酒股如青島啤酒（00168）發完盈喜之後，又再獲大行唱好，便可略知一二，所以幾時都話，唔好輕視傳統智慧。
恒指真係強到你唔信，皆因恒指只係用咗兩日時間，就重上18,200點水平樓上，整個大市交投氣氛亦見有所好轉。
唔知大家尋日有冇留意一件趣事，就係在尋日尾市時段，標智滬深300（02827）股價突然爆上，更囊括了尋日二十大升幅榜中的首位，埋單升51.41%，收報53.75元。不過，奇怪的是，明明呢隻指數股尋日大部分時間徘徊於37至38元左右，但最尾兩分鐘突然殺出個程咬金，出價53.45元買入9,000股，推高價位。到底係落錯盤，抑或有乜原因就不得而知。
（小尾）