港股只係調整幾日，呢兩日又重現生氣，除咗美股回升外，內地經濟數據公布理想，帶動深滬股市再創今年高位，港股順勢再升，重上萬八點水平。股仔鑊氣再現，詩詩見聯康生物（00690）未隨大市高開，即以每股0.13元排隊沽出，僅獲微利。不過，國美（00493）終於開車，昨日升7.2%，相信供股完成前，有條件挑戰2元水平，詩詩當然參與供股，手上股份待股價上破2元沽出先套利。
上周曾表示要再留意之前熱炒的中國風電（00182），可惜未有買入，改向中國電力新能源（00735）埋手，昨日走勢呈突破，配合成交料可重上高位。
中電能跟中國電力（02380）屬姊妹公司，同樣擁有國家背景，較早前公司宣布以總代價2.84億元向大股東收購風力發電項目，係注資行動一個開始。項目交易代價則以發行兌換價0.57元的可換股票據（CB）支付，現價0.61元，只係較CB高出7%，應該仲有可觀上升空間。
再加上中電能在轉型後，業務規模正持續擴大及逐步進入收益期，相信兩三年後將有較佳業績，此股具有如此背景，實在係長短皆宜。
詩詩