恒生之前話因為唔明CDO係乜，而避過次按大舉撥備一劫，跟住因為冇賣雷曼迷債，十幾間銀行周身蟻，佢哋照舊可以做旁觀者，唔使日日畀雷曼苦主踩場示威。之前嘅人債，恒生次次都有賣，淨係今次冇，點解？唔使講到明大家都應該心照，入到銀行最煩嘅手續係問卷填完又填，試過有客戶買人債用咗粒幾兩粒鐘，仲要銀行分分鐘最後都係叫你咪買。

人力及回報難平衡

喺銀行角度，佢哋賣債最多都係收十幾廿滴油水，但係就要搵個人招呼你粒幾鐘，仲要萬一唔好彩個客嫌煩發難，間銀行真係有排受。有口痕友話，今次邊個高層咁英明神武做呢個決定呢？唔通係新人事新作風？恒生今次係就係醒，但難為班恒生客戶，要為今轉買人債四圍撲。

余絲韻