本文重點
有「校長」之稱嘅聯交所前主席李福兆，佢個大孫女上個禮拜六結婚，喺香港筵開四十多席，作為爺爺嘅佢，亦特登返嚟香港飲呢餐喜酒。聽聞呢餐喜酒有唔少猛人到賀，始終「校長」喺香港證券界有頭有面，且有一定江湖地位，自然多人捧場。呢粒孫女係「校長」大仔李國麟個女，當晚有去飲宴嘅人都大讚新郎新娘郎才女貌，好登對。
泰國投資酒店生意
同「校長」係深交嘅「潮州怒漢」詹培忠，由於當晚唔喺香港，所以未能赴會，但詹培忠話「校長」今次返嚟香港，已經同佢見咗兩次面大談近況。詹培忠話「校長」近況唔錯，依家佢一年時間中，大約有6至7個月喺泰國，有3個月時間喺多倫多，其餘時間就會返嚟香港同埋周圍旅遊。
咁「校長」有乜搞作呀？聽講佢喺泰國有買地興建小型酒店，從事地產發展及投資，做生意賺錢係其中一個原因，另一個原因係有人會同佢報告發展計劃，佢又可以發表吓意見同觀點，藉此過吓日辰。佢下個禮拜至會離開香港。
「校長」一直係本港股壇爭議性人物，一方面佢奠定咗香港證券業發展，但當年因為股災停市決定，亦令到政府要大力改革交易所。
余絲韻