恒指繼日前創下一個月最大單日升幅後，尋日唔係無咗影，相反升勢持續，恒指重越萬八關。恒指甫開波已收復萬八失地，雖然亞太區內魚缸唔係個個咁標青，但祖國魚缸進一步做好，已足夠撐住本地魚缸再上一層樓。下半場歐洲魚缸亦高開，帶動恒指進一步攀升至18,289點高位，散場報收18,258點，升372點或2%。國企指數升208點或1.9%，報收10,860點。

炒友暫撤離期貨場

大市成交額略為回升至606億元，魚缸升勢頗為全面，反而期貨場成交縮水，期貨炒鬼唔單止未肯坐倉，令未平倉合約回落至較低水平，即市炒作唔算活躍。在下認為係好淡友在周初經歷過半分鐘波幅逾400點的大震盪後，寧願離場唔玩，加上呢兩日股仔似有番鑊氣，炒股唔炒市仲好搵。

大笨象（00005）跟花旗金融股做好，散場報收65.6元，升2.4%，祖國移動（00941）則升1%，報收74.7元，點計條數，呢兩件重磅股，在今個升浪中表現甚為落後。

港交所（00388）則重上120元樓上，報收121.2元，升3.7%，只要本地魚缸唔死得，就算近日每日平均成交額唔算勁多，一樣有新丁陸續排隊登陸本地魚缸，港交所唔怕無生意。尋日本地地主做火車頭，普遍升幅由2%至5%過外不等。紅色地主亦買盤積極，升幅畀本地地主更強勁，閒閒地升三五七個巴仙。

航運股抖完一輪，隨住波羅的海指數靠穩，甚至有重現升勢的趨向，航運股呢兩日又再於本地及祖國魚缸落鑊翻炒。七月份為航運業的傳統旺季，中海集運（02866）亦自七月份起，上調多條航線航運價，包括中南美、澳洲、中東、歐洲、西非等，提價幅度在每標準箱200至300美元之間。祖國出口新定單指數今年以來持續反彈，在五月和六月已連續兩個月站在50點的臨界線上，進一步印證祖國下半年出口好轉，料中海集運的業績可走出谷底。

透過收購改善收益

除咗以提價改善收益外，中海集運去年透過多項收購，八月份以26.01億元（人仔‧下同），向大股東收購主要從事內地及海外碼頭投資業務的中海碼頭發展全部權益。同年十二月份以3,424萬元收購上海仁川國際渡輪75.5%權益，有助填補部分收益，發揮協同效益，亦有利降低營運成本。至於上海仁川已有的韓國航線運作經驗及市場份額，完成收購後，中集將進一步拓展亞洲市場。

集團○八年營業額減11%至347.56億元，股東應佔溢利大降98.7%至4,297萬元。今年首季業績更見重創，按祖國會計準則計算錄得股東應佔淨虧損12.13億元。不過，踏入四月份，營運情況已有大改善，其中包括歐美進口批發商開始發出急單，令主營太平洋、歐洲地中海及亞太地區等航線的中集直接受惠。其股價在2港元附近水平完成小圓底收集，昨日在成交增加配合下，走勢呈現突破，只要市場氣氛配合，股價可望重返2.5港元之上。

古勝