上述賣出嘅太原樓低層單位，位於「六屍命案」凶宅嘅隔籬，單位本身冇問題，但由於中國人向來比較忌諱，所以往往凶宅附近單位嘅樓價亦受影響，個單位今年四月以80萬元賣出，以面積404方呎計，呎價1,980元，估計低市價最少一成，個單位上個月以100萬元火速轉售，呎價2,475元，仍然屬低於市價，但期內升值潛力同普遍單位分別不大。

傳西灣河水警總部搬竇

政府想搞好維港兩岸嘅海濱，以達成還港於民嘅目標，有區議員同Vincent講，東區區議會因而趁勢要求搬走位於西灣河海旁嘅水警總部及水警港口基地，以將港島東海濱長廊連成一線，據聞，保安局已應承會搵地搬，而規劃署亦同香港警務處及相關部門研究重置水警基地嘅可行性，至於地政總署亦答應會在行政上配合，安排撥地，照咁睇，搬基地都係指日可待，一旦成事，鄰近嘅嘉亨灣及鯉景灣就可以有更好嘅居住環境，樓價想唔升都難。

（Vincent Lau）