尋日港股表現認真麻麻，恒指繼續回落，由於市場憂慮內地進行微調政策，所以內銀股顯得沽壓沉重，當中跌幅較大的有建設銀行（00939）以及交通銀行（03328），雙雙錄得逾3%的跌幅。從走勢上來看，近日除內銀股外，就連一眾本地銀行以及地產股，表現都每況愈下，股友們真係要打醒十二分精神留意啦。
尋日新股志高（00449）首日上市，表現總算冇令大家失望，股價最高更曾升見過3.12元，雖然及後升幅收窄，但最終全日仍升10.57%，收報2.51元。一如早前所講，新股熱潮真係一浪接一浪，絕無冷場。好似繼琥珀（00090）後，志高才剛剛上市，話咁快建材股金隅（02009）經已殺到埋嚟，並將於本周五開始招股添。雖然尋日就唔見相關影子股有乜大炒作，但距離上市日期愈近，料及後炒作機會亦會愈多。
（小尾）