上星期港股跌穿18,000點後，窄幅徘徊冇乜方向，不過十個牛皮九個淡，尋日終於頂唔順跌咗落嚟，恒指報收17,254點，跌453點。好彩股仔有第一視頻（00082）帶領，仍見炒鬼入場玩，可惜詩詩所持中國風電（00182）唔肯行，輸少少沽出。兵貴神速，股仔唔行都係走為上着。以每股0.44元買入50萬亨泰（00197），希望0.5元附近沽出，博贏一成。
尋日個市急回，除咗怕美國復甦遙遙無期之外，亦怕內地微調，略為收緊貨幣寬鬆政策，都係揀受惠國策股份受影響較小。國務院國資委曾表示要加快推進央企重組，航天系一直進行重組，中航科工（02357）已行先一步，上周升破2元，昨日逆市再升逾6%，詩詩估計航天控股（00031）好大機會成為下一炒作目標。
航控主要業務包括製造液晶體電視、電訊及視聽產品、充電及保安系統等，牌面睇唔算十分吸引，不過其母公司早於四月向國務院申請，向航控併入十間企業，涉及資產逾60億元人民幣，總算為重組揭開序幕。即使未計及注資，航控每股資產淨值接近1元，以現價0.77元計算，折讓超過兩成，一旦注資落實，其上升潛力不容忽視。
詩詩