本文重點
絲絲細細個就學會一句成語，叫做「塞翁失馬，焉知非福」，事關滙控（00005）嘅世紀大供股，居然成為咗佢哋獲《歐洲貨幣》（Euromoney）選為今年「最佳環球銀行」美譽嘅一大原因；至於另一家英資銀行渣打，就成為「最佳新興市場銀行」。
「粉絲」多都你唔信
滙控供股反映咗佢嘅成功，《歐洲貨幣》講到明，話喺當時環境只有佢哋先可以集資到咁大筆錢，市場反應已反映咗佢嘅價值，所以話滙控唔集資，大家都睇唔到佢實質有幾多「粉絲」，真係多到你唔信。
《歐洲貨幣》仲話，以前啲銀行衰在將太多雞蛋放喺太少嘅籃入面，而滙控就平均分散業務，仲成功將已發展國家嘅業務同新興市場聯繫，係真正嘅環球銀行。其實放幾多雞蛋喺幾多個籃度有乜所謂，最緊要打雀咁眼睇實個籃！如果滙控當初睇實個「美洲籃」，大家估吓有幾唔同？
滙控嘅對手渣打成績表咁靚，上到獎牌榜好正常，不過渣打主攻新興市場，所以攞咗個「最佳新興市場銀行」獎，同樣實至名歸。
余絲韻