所謂書中自有黃金屋，新地（00016）喺今年書展同幾個組織合作搞咗個「新地2009齊齊讀好書」計劃，贊助1,008位小三至中二嘅小朋友每人200大元去書展搜羅心頭好。有錢在手買乜好呢？新地副主席兼董事總經理郭炳聯就大力向年輕人推介《Peaks and Valleys》。
推介《Peaks and Valleys》
山峰及低谷，唔係講緊個市，係講緊人生。呢本《Peaks and Valleys》係《誰移走了我的芝士》作者Spencer Johnson蟄伏10年後嘅最新力作，佢用一個簡單易明嘅小故事，講人生嘅大道理。話說有一位失去鬥志嘅年輕人，喺山頂遇到智慧老人，老人向佢講述處於山頂同谷底時應對嘅智慧，年輕人將智慧運用喺生活上而取得成功。個智慧就係，無論係高峰定低谷，都要用正面態度看事物。
除咗推薦成名作家嘅著作，新地亦會為大家帶來新面孔。去年與三聯書店合辦「年輕作家創作比賽」中勝出嘅8位新進作家，佢哋嘅首部作品亦會喺今年書展登場。
余絲韻