本文重點
分銷雷曼迷債嘅銀行依家正同證監會就和解講緊數，雖然銀行頻頻出招，不惜向外披露商討細節，近日甚至話有部分立法會議員介入，圖向證監會施壓，但種種動作未必咁易奏效，事關負責傾迷債和解嘅證監會執行董事施衛民出名係原則性強嘅人，佢由澳洲嚟到香港，最大心願係「捉大魚」，試問佢又點會咁易被搞掂？
重原則唔易就範
更巧合嘅係，佢份合約其實仲有兩個月就到期，佢個位係需要政府委任，咁佢又會唔會因為想續約，可能應政府要求盡快搞掂呢單嘢？同佢交過手嘅人都不約而同話，如果要佢喺份工同原則二選一，估佢一定會選原則，雖然估佢都真係仍想繼續為香港効力，因為呢度工作有發揮。其實睇番證監會呢3年，自佢嚟咗後，執法工作及力度的確比前增加，當中不乏捉了幾條大魚！
至於另一位關鍵人物行政總裁韋奕禮，有中環友就估佢做埋呢一屆之後未必會續約，如果佢返英國，咁今次名留青史就緊要了，估佢今次會力撐，做人民英雄。
雖然佢哋會企硬，但證監會都要面對現實，因為一旦傾唔掂，銀行打官司，證監會都唔想見到，始終對大部分苦主都冇着數。
余絲韻