話說絲絲周日去咗睇當奴比賽，見到啲後生拳手一敲鐘就埋牙肉搏，極速揮拳打到嘭嘭聲，五十二歲嘅當奴學拳只有一年幾，初上戰陣，對手譚督察係詠春高手，細佢五年，比佢高又係紀律部隊，當奴無論經驗、體能同身形都輸蝕，仲要二人都係同出冼國林師門，好清楚對方拳路。

鬥拳似做生意

當奴參加嘅係七十公斤級散打賽，三局兩勝制，每局淨打兩分鐘。到當奴上台，絲絲個心卜卜亂跳，眼見當奴同譚督察打法好唔同，係電影上見到啲高手穩守突擊型，一陣拳來腳往，當奴曾經撻低對手兩次拎高分，結果只係頭兩局共四分鐘，當奴就以點數拋離勝出。

當奴贏咗依然好Cool，譚督察有個同僚就好欣賞佢，話想同佢切磋切磋添。之後當奴去咗鯉魚門食海鮮慶祝，仲話九月會有新戰。當奴賽後檢討話，全靠賽事每局只係短時間，好似做生意咁，勝在小心，窺準空隙就猛攻，賺取點數。

絲絲尋日特登再打個電話畀當奴個靚靚秘書天娜，問佢當奴塊面有無青腫，天娜肯定地回答：老闆乜事都無喎，仍然係咁靚仔。

余絲韻