恒指一跌穿17,500點，即玩大插水，不過市場炒股唔炒市，大市插得愈甘，股仔炒得愈勁，股仔一浪新人換舊人，近日股仔由第一視頻（00082）及聯康生物（00690）等生力軍接力。
昨日大市狂插水，不過就畀古晨發現到隻好嘢，就係裕田中國（00313）。去年初賣盤給北京嘅裕田集團，裕田集團其中一個股東正是北京首創，在港上市的首創置業（02868）亦係北京首創附屬，加上裕田集團亦與銀華基金關係密切，銀華基金管理資產逾千億元人民幣。近日裕田從低位炒上，以阿媽在北京嘅實力，相信炒上應是有項目要注入，市傳將注獲入二線城市房產項目，難怪升勢如此凌厲，可順勢追入，暫時先睇0.5元，止蝕位0.3元。
古晨