中港地主齊齊受壓

大笨象（00005）上周五在ADR一枝獨秀不過係幻象，昨日跟祖國移動（00941）帶頭拖低恒指，前者跌近2%，報收61.35元，後者跌2.5%，報收71.95元。無論本地抑或紅色地主，之前兩個月均累積巨大升幅，回調幅度較大亦屬意料中事。信置（00083）跌5%，在大隻佬中跑尾三，亦係表現最曳本地地主。其他本地地主都腳軟，至少跌2%或以上，但相對紅色地主調整幅度較細。

華爾街擔心花旗復甦之路仍漫長，本地跟祖國鑊鏟友則憂慮祖國微調政策出台，紅色錢莊受壓。杭州收緊第二套住房信貸或擴展至其他城市，中國奧園（03883）批盪抽水，缸邊友擔心其他紅色地主抽水行動陸續有來，惟有先下手為強，狂質紅色地主。紅色地主昨跌3%已屬等閒事，完成抽水的奧園則插水14.2%，報收1.69元，跌破1.73元配股價。不過仍有大行睇好紅色地主，「花旗邦」出吹水報告，上調華潤置地（01109）目標價至20元，維持「買入」評級。

東航（00670）終成功購併上海航空，昨復賽曾升14%，不過散場升幅收窄至只有2.8%，早段高追咪話唔濕滯。查實東航購併上航，講咗超過一年，落實亦唔算係新聞，加上東航自未能成功引入獅城航空集資後，其財政狀況可以話苦不堪言，若非有官府資助，早已關門大吉。在下唔認為呢個消息仲有炒作空間，尋日不幸高追要考慮止蝕。

昨日登場新丁志高控股（00449）受魚缸腳軟影響，散場收報2.51元，僅較招股價升一成，跟上兩星期登場的新丁表現比較，差咗一大截。至於正在接受配售認購的北京金隅（02009），卻錄得超過10倍國際配售爆燈額，或提前截飛。本地魚缸新丁排隊上市，祖國魚缸重啟IPO後，亦陸續有新丁登場，又或者係H股回歸。由中國海外（00688）分拆上市的中國建築（03311），佢兩個的阿媽中國建築股份，亦即祖國最大營建企業，準備登陸祖國魚缸，展開超過400億元人仔的吸水大計，集資規模僅次於工行（01398）。中國建築昨日在本地魚缸逆市升5.5%，當然係慶祝阿媽獲批登陸祖國魚缸。

祖國業務比例提升

中國建築目前公司生意主要是在香江及馬交，佔去年總收入66%，相反祖國業務僅佔9.5%，不過集團跟阿媽今年上半年達成協議，未來將染指更多祖國項目，料今後祖國業務比例將會顯著提升，相信會係祖國4萬億元人仔基建投資的主要受惠者之一。

睇番目前祖國A股的建築公司，主要集中在華北及華東，其中又以華東地區最多，位於上海的建築上市公司共計就有9家，平均PE都超過20倍。至於本地魚缸的中國建築，去年度賺4.89億元，往績PE約15倍，跟祖國同類股份比較，仲有大把水位升，大有條件借今次阿媽在祖國魚缸登陸而炒上。

古勝