本文重點
近排天氣炎熱，最好去大開冷氣嘅商場行街，新地代理租務部副總經理鍾秀蓮同Vincent講，新地（00016）旗下八大商場豪花840萬元做暑期推廣，比舊年勁升1.23倍，預計暑假人流可達4,700萬，營業額11.8億元，分別比舊年升18%及24%。
港置派半年成績表
鍾秀蓮又話，呢兩個月會安排48個內地團去其中三個商場，估計可以為商場帶來超過1,000萬元嘅生意額。至於上半年八大商場人流共1.2億，營業額30億元，分別比舊年升17%及20%，租金及附加租金收入4.2億元，亦按年升18%。
上半年過咗無幾耐，又係地產代理行派發成績表嘅時間，美聯（01200）集團主席黃建業昨日親自頒發港置嘅「半年盈利」同「置尊」兩項大獎，前者係由九龍區高級營業董事姚偉南奪得，佢統領嘅港景峯分行，更加以逾700萬元嘅佳績，成為九龍區上半年最佳業績嘅分行，至於「置尊」得主係港島豪宅營業董事林樹權。
另外，美聯昨亦向40名優秀營業員頒發「表現突出獎」以作嘉許。
（Vincent Lau）