本文重點
依家個股市雖然好番少少，不過大家都係未敢瞓身入市，始終都係睇定啲、保險啲好。講開保險，有保險公司之前推出咗高息儲蓄保，據聞反應相當熱烈，仲話要「安哥」，雖然第二個儲蓄保個息就差少少，但係點都好過放落銀行，相信都會幾好賣。
保證利息五厘遠超銀行
大銀行都將存款利息減到得0.001%，即係擺10萬蚊落去，一年後先拎多1蚊，真係打個乞嗤就冇咗！
呢間保險公司之前都推出過儲蓄保，保證利息有成5厘咁高，所以出街唔使一個月，已經吸到成1億美金嘅生意，今次個息雖然最多得4.7厘，不過始終多銀行成條街，睇怕好快都會爆額。
話時話，點解依家保險公司反而仲可以畀到咁高息率呢？其實保險公司收埋咁多保費，啲資金係會再拎出去投資，以前一向做法就係，賺到嘅回報就自己袋多啲，畀番少少息班客戶。不過，依家佢哋想做番多啲生意，所以賺到嗰筆，就留番多啲畀班客，自己反而攞番少啲，令到保證息率高啲吸引啲，咁先可以吸到多啲客仔。
余絲韻