本文重點
近年裁員消息冇停過，內地報章日前就寫咗篇報道，話四大會計師行之一嘅安永可能裁員，安永嘅合夥人黃文就急急澄清，話絕無此事，公司只係勸退部分能力不足嘅員工，並唔算真正嘅裁員。
個市咁差，會計界前排都傳出要員工放無薪假等節省成本嘅消息，家下IPO重啟，照計會計師行應該會受惠，但係喺呢個時候，就有內地報章話由七月八日起，陸續有安永員工接到電話傾解除合約。
評估出爐中港涉200人
黃文解釋，年終評估結果出爐之後，近期嘅做法係勸退一啲工作表現比同級員工差嘅員工，呢幾日已經開始同未必適合嘅員工協商，畀佢哋去選擇其他職業，涉及嘅員工全國加埋約200名。
佢透露，今次被勸退嘅200名員工佔公司總員工數目2%，分布喺內地同埋香港14間分所。講完令人沮喪嘅勸退話題，佢就大派定心丸，話升職同加薪冇乜大變化，同往年一樣，好多人都會有得升職。真係有人歡喜有人愁。
余絲韻