本文重點
香港按揭證券公司「走出去」後，依家「走上去」都有新里程碑，因為按證同深圳結算中心合組嘅擔保公司——深圳經緯盈富擔保，昨「開張大吉」，金管局總裁任志剛同深圳人行行長羅伯川都有出席開業儀式，仲齊齊切燒豬。
開幕禮星光熠熠
按證去年喺馬來西亞開咗合營公司後，絲絲已覺按證愈快進軍內地愈好，因咁多人睇好內地樓價，需求又多，按證仲可以加強「深港交流」，絕對係一石二鳥。
結果今年上半年按證同深圳結算中心嘅合作，果然傾得如火如荼，啱啱踏入第三季已開工大吉。今次呢間公司改名做「深圳經緯盈富擔保」，由金管局副總裁彭醒棠做董事長，註冊資本1億元人民幣，按證出資九成。
昨日深圳經緯盈富擔保正式開業，開幕禮認真人才濟濟，除咗任總、羅伯川同彭醒棠之外，當然唔少得按證總裁劉怡翔，同深圳人行兩位副行長張建軍同崔瑜。
按證以前提及北上發展時，劉怡翔已經講過今次係「試金」，要了解內地市場背景，又可以增加交流，絲絲覺得內地房地產市場咁大，按證應該都會進取啲，快啲喺唔同省市增加「網點」。不過淨係深圳已有幾百間擔保公司，有阿爺背景嘅只係得十間左右，除咗合營公司外，按證會唔會考慮收購民企呢？
余絲韻