美股上周五假期休戰，港股當日亦靜過鬼，即使兩隻新股霸王（01338）及秦發（00866）首日上板，但全日成交金額亦只有543億元，交投淡靜。詩詩當日無心戀戰，加上買入國美（00493）以為除權後更有睇頭，豈料早段升至1.83元後無以為繼，收市前又見沽盤不限價沽貨，股價收報1.74元，跌1.1%，現價計落條數，收埋「威士」亦無着數，詩詩更加無心機。暫時決定繼續持有國美股份，獲發供股權後希望「威士」可以較高價沽出，執番些少甜頭。
霸王招股成績斐然，首日上市收報3.03元，較招股價升27.3%，可見內需消費股相當受市場歡迎。
講到內需股，中國旺旺（00151）係詩詩心水之一。集團在內地食品市場具領導地位，其品牌具認受性，分銷滲透率亦高，公司又擁有良好的管理，其邊際利潤率及股東回報率一向高於不少同業。
旺旺的核心業務表現穩健，盈利質素良好，現金流強勁，而淨現金的財務狀況也為其帶來優勢。旺旺去年開始重組，除增加生產設備投資外，也擴大銷售網絡，令集團長期更具競爭力，股東回報自然更上一層樓，值得候低吸納作中線投資。
詩詩