財經雜誌《福布斯》、《經濟學人》等唔係Baby杯茶，雖然可從中偷師，但當每篇文章都好似一個字海，實在消化唔嚟。不過，外國唔少非財經類雜誌，內容都涉獵到經濟、金融範疇，就好似美國時尚雜誌《名利場》（《Vanity Fair》），便有詳盡跟進馬多夫案，仲有諾貝爾經濟學獎得主斯蒂格利茨（Joseph Stiglitz）寫專欄，最新一篇文章係「華爾街的有毒訊息」，佢擔心金融海嘯過後，美式資本主義聲名狼藉。
退休轉保守策略
金融海嘯成因複雜，但很早之前，唔少人預測美股喺○七至○九年期間見頂，原因係Baby Boomer（BB）。
二次大戰後，美國出生率急升，出現所謂嘅嬰兒潮，BB就係指一九四六至一九六四年出世嘅人，佢哋成長喺美國經濟最繁盛時代，累積了大量財富，包括股票和物業，而最早一批BB就係大概喺○七年退休（60歲左近），佢哋嘅投資策略變得保守，沽出退休戶口401（k）內股票等，○八年後美國每年有逾400萬人退休，沽貨壓力連同減少消費嘅影響不容忽視。
股市應納入人口因素
日本嘅BB早喺九十年代開始陸續退下火線，有人認為呢個因素拖累日股表現。除咗市盈率、股息、盈利增長等之外，人口結構都要納入考慮，尤其係已發展國家。